1Cor 6 | GbrGAW | STEP | Ngye ɓo nzai dna-do lo n wo zado yi, kni nu zhin fyei lo a wadayi aba n ɓa zhin a shetan da, to fya lo cei n na Yesu viyi aba nu, a wu oza n wo zhin oza gaiciya-da nʼfya tasin ma?

1 Corinthians 6

1 Ngye ɓo nzai dna-do lo n wo zado yi, kni nu zhin fyei lo a wadayi aba n ɓa zhin a shetan da, to fya lo cei n na Yesu viyi aba nu, a wu oza n wo zhin oza gaiciya-da nʼfya tasin ma? 2 Fye ta kpelo ge eyi a Yesu-viyi ɓei da anyi ye owa nʼwyiho yim? To kni ɓei nu zhin to fyei ɓa mi, fya ku aɓo a ɓi-ɓiyi aje nfya tasin ma? 3 Fye ta kpelo ge eyi a Yesu viyi ɓei da amalaika owa har ya ga ɓa lada nʼshe m? Ntu cenu ko bmiya lo fya mi fya ku aɓo aɓi-ɓiyi aje n nanyi ye n tna ɓo dna yi. 4 To esanu aɓoye pya ɓe, kni nu zhin fyei lo awadai aba nɓa to zhin a Yesu viyi ma? 5 Mi ye ma dna fye vinyiko nu. Ashe ɓeyekpei to lo ko gmanyi n na Yesu-viyi nwo ɓa mi wa gna a ɓena ajeyam? 6 Ama maimako deye, sai Yesu-viyi wa lo n wo Yesu-viyi doyi n na tna-viyi wada ɓokun.

7 Aje kara zhin, ko zhin knizun nu n fya ba a Yesu-viyi. Fye ta mi fya bwa bugba n ɓenukwoi yi n naɓa zhin fyem? Ko gna bmiya lo n Dagayi aba fya fwa a gyi fye fi. 8 Ama maimako deye, fye nu n laifi lo n fyehin tukwo, fyei gyi azaje fi, har ma nfya ʼjei ɓe.

Azaho Ta Lo Shekwoyi Ebe Min

9 Fye ta kpe lo ge aza n ɓa zhin aɓoi pya ɓa to n gado yi lo n Shekwoyi bemi m? Fye to dna fyehin tukwo wyi m, ntuge aza nɓa zhin anagbai, ko ɓai gba ashan, to ɓai zhin befyece m, ko kwa zanugbai woi wagye n zanugbai yi, nyikoza woi wagye n zanugbai yi, nyikoza woi wagye n nyikoza yi-ɓa ta lo Woʼbe mim. 10 Nlonu avi, ko afan-nada, a nyasin-yi, aza gyifi-yi, ko azaje-zaje-yi. 11 Esa lo n na zaho ɓei bwa wu lonu n fye mi, ama n sayi ala fya laifi zhan ya, a la fye kni ntu Shekwoyi ɓo. Wo la fye gwo ntu nya ɓo n Dagayi Yesu Kristi n Zafun Shekwoyi nya yi wa zhin nfye ɓo. 12 Miɓa mi ma zhin nyaho-nyahoi to Yesu yi na tu mi ko gbem, ama aɓo vinya nu to bmiya lo ntu mi ɓom, Ko ai ɓei la ye ge mi zhin aɓo vinya, mi ta ye ma zhin ɓo ko ɓa wan mi shi har to miyi mi ma fa ko zhin ɓo nʼsa mi ye ce yim. 13 Shekwoyi la nubo gayi ntu nyagyi ɓo, ama tuge ya gyi ndu ya nubo-fu yam. To zhin nubo ge nyagyi zhin ɓo yako num, ntuge Shekwoyi ɓa du a nubo ya ɓedo n nyagyi yi n wyiho yi. Ama anagbai zhin to bmiya lom ko fyefye: a to zhin ya nayi ga ce num, ama ntu Dagayi ɓo, woi cei pma lo wa nu ya nayi n wohin tukwo yi.

14 Shi Shekwoyi ɓei la Yesu kala n vingwo, elo nu Wo ɓei kuyi kala ce n wo iko yi. 15 Fye ta kpelo ge efye nayi zhin gmanyi nu n Yesu nya yim? To miɓa la Kristi nayi ma ɓe ko do n Karuwa nya yi? Ko fye-fye! 16 Ko fye ta kpe lo ge oza wo lo wa wangye n Karuwa yi wo la ze gmanyi n woi ma? Littafi ku da peipei, oɓa ngun-aba, ɓa ze gmanyi. 17 Ama oza n wa wohin ga Dagayi, wo la ɓedo n Kristi yi, ɓa ku ze ngye oza gmanyi.

18 Fye bui anagbai zhin si. Laifi daho-dohoi n za zhin, ko ta to nayi bwa m, oza wa zhin anagbai, wo zhin wo nayi nu laifi. 19 Fye ta kpe ge ofya nayi zhin Zafun Gyi-gyi-yi asese ba nu, n Shekwoyi ɓei ga fye nyi, Woi sase lo dna fye mim? Ofya nayi to zhin fya nya num. 20 Shekwoyi ɓei la fye si n kona ko-kwoyi. Ntu cenu fye ga Shekwoyi mwa-mwa n fya nayi-yi, ntuge owa nya nu ɓai.